Titus 2
Shaula N Bayi Aba
1Ama ohohin, daɓo n kwo kunce n na asese manayi n ɓa kunce n Yesu-viyi gaiciya nyai. 2Wu azakwoi ɓa ku ɓahin wanshi, ɓai zhin ɓe manayi, ɓai kpe gaiciya ye ɓai zhin ɓeho-ɓehoyi n ye-yei n bugba bwayi.3Wu anyigbakwowyi ɓa ku cepi ɓai ga mwa-mwa dna n na ɓo vinya n ɓa zhin. Ɓato zan laɓa ɓai zhin agnagba n na aza tukwon, to ɓa ze ajesinyi n mwan, ama ɓaku ze aɓo manayi wuyi. 4Anyigbakwoyi ye ɓa wu anyikwo aza-zayi ɓa sase pi-pi ɓaye n ɓa ɓayi, ɓedo n ɓa ɓiyi. 5Ɓa ku ze aza manayi, abugba manayi da, ɓai zefi n ɓa puwa, aza nunuyi, ɓai vi oɓa aɓa ɓeda n na abai to a sa a Yesu viyi eye nukwoyi, n aza aba n ɓa kpe ɓa ye m.
6Elonu, gna aɓi-a-nuyi ɓa zhin peceiye ɓai wan ɓahin shi naɓo vinya. 7N ya tilas ohohin ha ze efye manayi dna n na aɓo vinya. Fa nyaho-nyahoyi n ho ɓa zhin kwa wu n ge ho ye gaiciya lo n nwyeyi kana. 8Oho azata la ze cewo n tukwo yi ku, n na abai oza n wo ye wa na aɓo n hoi vinyikwo a wowo, ntuge aɓenya-ci ɓa to lo dna n oɓo n ha dan.
9Gna afyenu ɓa vi oɓa adagayi ɓo, ɓa zhin atna ɓa zhin atna ɓa zhin oɓo n kwo da ɓa. To ɓa da ɓeda kasam. 10Kwo ɓa wyi evim, ama ɓa wu ge ɓa zhin azanu aɓa mi a kpema, Nlonu ɓaɓa zhin aza ɓaye ɓa ga eyi Gniyi n yi Shekwoyi gaiciya.
11Gama cauta gni-gni nya ala ga aza vinya. 12Ɓedo n na awyegayeyi yekpe n ge Shekwoyi ye ya pmi avun wu aɓo nukwoyi n na aɓo awyeda nukwoi, ya ze aza manayi, ya wo Shekwoyi dna fyegyi-fyegyi. 13Yi shi esayi awye n yi pmi nyi, n na aɓei gyewo mwa-mwa wye n cei nyi, mwa-mwa eyi Shekwoyi dnagmayi n eyi Gniyi Yesu Kristi yi. 14Wo ɓei fi Zafun Gyi-gyi-yi nya n yi abugbami dna n Shekwoyi owa ntu yi alaifi ɓo nu, n na bai wa gni yi to ya je kayafi n laifi ci-ci, wa ze yi owo aza, n na abugba manayi n pwa wo yi, ya zhin azaje ɓemana. 15Tile ha wu aɓedye, ha ga oho aza kala ɓa zhin ɓa, hoi zhin ɓa fi n zokwo n sai nkwo kunce n gye oza n wo n ikoyi lo wa zhin lonu. To ye ozaho wa zhin nubo nge oɓo n ho da nyi kwo to kunce lon.
Copyright information for
GbrGAW